जनकपुरः घर पसेर एक परिवारलाई कुटपिट, गर्भवति युवतिलाई पनि छाडेनन

न्यूज ब्यूरो, जनकपुरधाम । प्रदेश नम्बर २ को अस्थायी राजधानीस्थित गएराती एक परिवार उपर हमला गरिएको आरोप लगाइएको छ ।

जनकपुरधाम उपमहानगरपालिका वडा नम्बर १४ मुजेलियास्थित एक परिवारका सदस्यहरुलाई लाठी, भाटा र रोडाले प्रहार गर्दा ४ जना घाईते भएका छन् ।

मुजेलियास्थित रहेको बिजय कुमार यादवको परिवारजनमाथि गएराती करिब १०ः२५ बजेको समयमा घर पसेर कुटपिट गरिएको बताइएको छ । सो क्रममा सोही परिवारका ४ जना घाईते भएका छन् ।

मोटरसाईकलमा गएका १०÷१२ जनाको समूहले लाठी, भाटा र रोडाले यादव परिवारमाथि आक्रमण गरेको आरोप पीडित परिवारका आजाद यादवले लगाएका छन् । सो क्रममा उनका बुवा, आमा, दिदी र स्वयँ पनि घाईते भएका छन् ।

पुरानो झगडाको निहुँमा वडा नम्बर १४ का वडाध्यक्ष पुण्यप्रताप यादव (पुणे) ले उनीहरुमाथि आक्रमण गर्न गुण्डा पठाएको आरोप छ । सो क्रममा पुणेका भाई दिपक यादव र दिलीप यादव समेतले कुटपिट गरेको आरोप छ ।

वडाध्यक्ष यादवले पठाएको मान्छेहरुले बाँसको भाटा सहित छुरा समेत प्रहार गर्दा ४ जना घाईते भएका हुन् । सो क्रममा आजाद यादव सहित उनकी दिदी बर्ष २२ की नितु यादव, आमा सीता यादव र बुवा विजय कुमार यादव घाईते भएका छन् ।

नितु ४ महिनाकी गर्भवति छिन् । मोटरसाईकलमा आएका उनीहरुले नितुलाई लात्त, भाटा र इटाले हानेका थिए । आजादलाई छुरा प्रहार गरेको आरोप लगाइएको छ । आजादका अनुसार, वडाध्यक्ष यादवले यसपटक गरी ४ पटक घर पसेर कुटपिट गरेको आरोप लगाए ।

उनका काका बर्ष २६ का राहुल कुमार यादवसँग व्यक्तिगत निहुँमा उनलाई कुटनको लागि गुण्डा पठाएको र प्रतिकार गर्दा भाटा, इटा र छुरा समेत प्रहार गरी घाईते बनाइदिएको गुनासो पोखेका छन् ।

वडा प्रहरी कार्यालय मुजेलियाले गएराती झै–झगडा र कुटपिटको घटना भएको बताएका छन् । उनले ४ जना घाईते भएको बताए । सो सन्दर्भमा वडाध्यक्षको सँलग्नताबारे अनभिज्ञता प्रकट गरे । वडा प्रहरी कार्यालय मुजेलियाले एक जनालाई पक्राउ गरेको छ भने अन्य जना फरार रहेको बताएका छन् ।

यता, वडाध्यक्ष यादवले भने राजनीतिज्ञ व्यक्ति भएको कारण आफूमाथि झुठो आरोप लगाएको बताए । उनले सो घटनामा आफ्नो कुनै सँलग्नता नरहेको दाबी गर्दै मेलाको विवादले झै–झगडा भएको बताए ।