वायूसेवा निगम सुधारको लागि ठोस कार्य योजना ल्याउनुछः मन्त्री अरगरिया

न्यूज ब्यूरो, जनकपुरधाम । नेपाल सरकारको संस्कृति, पर्यटन तथा नागरिक उड्यनमन्त्री उमाशंकर अरगरियाले वायु सेवा निगमको वस्तुस्थिति सुधारको लागि ठोस कार्य योजनाको आवश्यकता औल्याएका छन् । उनले सुधारको ठोस कार्ययोजना ल्याउन नेपाल वायु सेवा निगमलाई निर्देशन पनि दिएका छन्।

सोमबार काठमाडौंको न्युरोडस्थित निगमको कार्यालयको अनुगमन गर्दै मन्त्री अरगरियाले सरकारले आशा गरेजस्तो निगमलाई सुधार गर्न ठोस कार्ययोजना ल्याउन निर्देशन दिएका हुन्।

उनले निगममा देखिएको कमीकमजोरी सच्चाउन एक साताको समय दिँदै त्यसपछि आफूले हस्तक्षेप गर्ने चेतावनी दिए। निगमसँग आन्तरिक उडानका लागि प्रयाप्त जहाज हुँदाहुँदै पनि उचित प्रयोग नभएको गुनासो आएको उनले बताए। उनले बिगत एकवर्षदेखि आन्तरिक उडान नहुनुको बस्तुनिष्ट कारण खोजिने उल्लेख गरे।

कोरोनाले हवाइसेवामा पारेको असरबाट जुध्न र यसबाट निगमलाई पार लगाउन सरकारको मुखमात्र नताकि निगमलाई अघि बढाउने कार्ययोजना ल्याउन निर्देशन दिदै मन्त्री अरगरियाले त्यसैका आधारमा मन्त्रालयले आगामी रणनीति बनाउने जनाए ।

यसका साथै, उनले निगमको माथिल्लो तहमा रहेका कर्मचारीको क्षमता अनुसार उचित स्थानमा राखेर कार्यसम्पादन गरे मात्र निगमको हित हुने भन्दै कर्मचारीको विज्ञता र क्षमता अनुसार कार्यसम्पादन गर्न गराउन निगमलाई निर्देशन दिए।

उनले बिगतको कमीकमजोरीबाट पाठ सिक्दै आगामी दिनमा बजार हिस्सामा स्वामित्व जमाउन आक्रमण ढंगले लाग्न पनि निर्देशन दिए।

सो क्रममा निगमका महाप्रवन्धक डिम प्रसाद पौडेलले निगमको आगामी कार्ययोजनाका बारेमा जानकारी गराएका थिए। निगमलाई अहिलेको अवस्थाबाट माथि उठाउने धेरै सम्भावना रहेको र त्यसमा सरकारको सहयोग चाहिने उनले बताए।

कोरोनाको दोस्रो संक्रमणका कारण निगमले तय गरेको कार्ययोजनालाई कार्यान्वयन गर्न सफल नभएको जिकिर जनाएको छ।