छापामारीको डरले जनकपुरको पसलहरु बन्द !

न्यूज ब्यूरो, जनकपुरधाम । बजार अनुगमन टोलीले जनकपुरमा सँचालित पसलहरुमा चेकजाँच कडाईका साथ गर्ने भनिएपछि जनकपुरको पसलहरु बन्द भएको छ ।

पसलमा टोलीले छापामारी गर्ने हल्लापछि पसलेहरुले पसलहरु बन्द गरी घर बसेका छन् । विहिबार जनकपुरभरिको अधिकाँश भन्दा बढी पसलहरु बन्द भएपछि उपभोक्ताहरु मारमा परेका छन् ।

विहिबार जनकपुरको प्रायः सबै चोकको कपडा पसल, किराना पसल, होटल, जुत्ता पसल, कस्मेटिक पसल, मोबाईल पसल लगायतका पसलहरु बन्द रहेको देखियो ।

प्रदेश नम्बर २ को महोत्तरीको विभिन्न बजार क्षेत्रमा बजार अनुगमन टोलीले अनुगमन तीव्र पारेपछि डराएका व्यापारीहरुले जनकपुरको समेत पसलहरु बन्द गरेका छन् ।

सो सन्दर्भमा जनकपुरधाम उद्योग वाणिज्य संघका अध्यक्ष ललितकुमार साहले व्यापारीहरुले हल्लाकै भरमा स्वयं आ–आफ्नो पसल बन्द गरेको बताए ।

जनकपुरका व्यापारीहरुलाई निर्वाध रुपमा पसलहरु सँचालन गर्न आग्रह गर्दै उनले हल्लाको पछि नलाग्न पनि आग्रह गरे । जनकपुरका व्यापारीहरुले चेकजाँचको डरले पसल बन्द गरेपछि कतिको ठगी गरेको हुन सक्ने अनुमान गरिएको छ ।

राजस्व छली गरिएको हुन सक्ने वा गैर कानुनी रुपमा समेत पसल सँचालन गरेको हुन सक्ने डरले पसलहरु बन्द गरिएको टिकाटिप्पणी गरिएको छ । पसलमा ठोस बिल समेत नदिने गरेको जनकपुरका केही व्यापारीहरुले पसल बन्द गरेपछि आम उपभोक्ता प्रभावित भएको छ ।