१०औँ राष्ट्रिय खेलकुदका लागि धनुषामा जिल्ला छनोट सुरु हुँदै, २८ खेलका खेलाडी छानिने

न्यूज ब्युरो, जनकपुरधाम । १०औँ राष्ट्रिय खेलकुद प्रतियोगिता–२०८३ का लागि धनुषामा जिल्ला स्तरीय खेलाडी छनोट प्रक्रिया सुरु हुने भएको छ । जिल्ला खेलकुद विकास समिति, धनुषाले आगामी कात्तिक १६ गतेदेखि २८ खेलका विभिन्न विधामा प्रतिस्पर्धा गर्ने खेलाडी छनोट गर्ने भएको हो ।

आगामी मंसिर १६ देखि २७ गतेसम्म कर्णाली प्रदेशका विभिन्न जिल्लामा सञ्चालन हुने राष्ट्रिय खेलकुद प्रतियोगितामा मधेश प्रदेशबाट २८ खेलका खेलाडीले सहभागिता जनाउने कार्यक्रम छ ।

प्रतियोगितामा धनुषाको प्रभावकारी सहभागिता सुनिश्चित गर्ने उद्देश्यले शनिबार जिल्ला स्तरीय खेलाडी छनोट तथा तयारीसम्बन्धी छलफल बैठक सम्पन्न भएको छ ।

जिल्ला खेलकुद विकास समिति, धनुषाका कार्यालय प्रमुख प्रमेन्द्र कुमार बछारको अध्यक्षतामा सम्पन्न बैठकमा मधेश खेलकुद परिषद्का सदस्य–सचिव शिवजी प्रसाद कानु गुप्ता प्रमुख अतिथिका रूपमा सहभागी थिए ।

बैठकमा धनुषाबाट राष्ट्रिय प्रतियोगितामा सहभागिता, खेलाडी छनोट प्रक्रिया, आवश्यक तयारी तथा विभिन्न खेलकुद संघबीचको समन्वयका विषयमा छलफल गरिएको थियो ।

बैठकमा मधेश खेलकुद परिषद्का कार्यकारिणी सदस्य एवं प्रदेश एथलेटिक्स संघका अध्यक्ष दिपेन्द्र कुमार गोईत, तालिम तथा प्रशिक्षण निर्देशक भरत यादवसहित जिल्लाका विभिन्न खेलकुद संघका अध्यक्ष तथा प्रतिनिधिहरूको उपस्थिति रहेको थियो ।

खेलकुदको विकास, प्रतिभावान खेलाडीको पहिचान र राष्ट्रिय स्तरमा धनुषाको पहिचान स्थापित गर्न खेलकुद संघ, प्रशिक्षक तथा सरोकारवालाबीच सहकार्य आवश्यक रहेकोमा बैठकले जोड दिएको छ ।