काठमाडौंमा शंकास्पद गतिविधिमा संलग्न १० बंगलादेशी नागरिक पक्राउ

न्यूज ब्यूरो, जनकपुरधाम । मधेश प्रदेश सरकारअन्तर्गत स्वास्थ्य तथा जनसंख्या मन्त्रालयका महत्वपूर्ण निकायहरू दरबन्दीअनुसारका प्रमुखविहीन बनेका छन् । ११ औँ तहका कर्मचारी प्रमुख रहने व्यवस्था भएका प्रदेश जनस्वास्थ्य प्रयोगशाला र प्रदेश स्वास्थ्य आपूर्ति केन्द्रमा सातौँ तहका कर्मचारीलाई महिनौँदेखि निमित्त प्रमुखको जिम्मेवारी दिइएको छ ।

प्रदेश जनस्वास्थ्य प्रयोगशालामा विगत करिब तीन महिनादेखि सातौँ तहका ल्याब टेक्निसियन गुणानन्दप्रसाद साह निर्देशकको जिम्मेवारीमा छन् । उक्त निकायमा ११ औँ तहको दरबन्दी रहेको बताइएको छ ।

उपलब्ध विवरणअनुसार १० औँ र ११ औँ तहका कर्मचारीलाई जिल्लातर्फ खटाइएको अवस्थामा सातौँ तहका कर्मचारीलाई प्रदेश जनस्वास्थ्य प्रयोगशालाको नेतृत्व दिइएको हो ।

यस्तै, नवौँ तहका सिनियर ल्याब समूहका कर्मचारी कुमार मृत्यूँजय प्रसादलाई सर्लाहीस्थित ल्याबमा काजमा खटाइएको छ । सर्लाहीको ल्याबमा आठौँ तहको दरबन्दी रहेको अवस्थामा नवौँ तहका कर्मचारीलाई त्यहाँ खटाइएको दाबी गरिएको छ ।

मृत्युञ्जयप्रसादले आफ्नो काज फिर्ता गरिदिन पटक–पटक निवेदन दिएको भए पनि हालसम्म काज फिर्ता नभएको स्रोतको भनाइ छ ।

स्वास्थ्य मन्त्रालयअन्तर्गतका कर्मचारीको खटनपटनमा समेत तह र दरबन्दीअनुसारको व्यवस्थापन हुन नसकेको आरोप छ । सम्बन्धित कर्मचारीका अनुसार दरबन्दीअनुसार कर्मचारी खटाउनुपर्ने वा सो पदमा उपलब्ध कर्मचारीमध्ये वरिष्ठलाई जिम्मेवारी दिनुपर्ने अवस्था हुँदाहुँदै कनिष्ठ तहका कर्मचारीलाई संवेदनशील निकायको नेतृत्व दिइएको छ ।

प्रदेश स्वास्थ्य आपूर्ति केन्द्रको अवस्था पनि उस्तै देखिएको छ । उक्त केन्द्रमा ११ औँ तहको कर्मचारी निर्देशक रहने व्यवस्था रहेको बताइएको छ । तर ११ औँ तहका जनरल हेल्थ समूहका डा. सुनिल कुशवाहालाई सिरहा अस्पतालमा काजमा खटाइएपछि आपूर्ति केन्द्रमा सातौँ तहका फार्मेसिस्टलाई करिब तीन महिनादेखि निमित्त निर्देशकको जिम्मेवारी दिइएको छ ।

मधेश प्रदेशमा स्वास्थ्य सेवातर्फ ११ औँ तहका चार जना तथा नवौँ र १० औँ तहका गरी करिब २० जना कर्मचारी कार्यरत रहेको अवस्थामा प्रदेश जनस्वास्थ्य प्रयोगशाला र स्वास्थ्य आपूर्ति केन्द्रजस्ता संवेदनशील निकायमा सातौँ तहका कर्मचारीलाई निमित्त प्रमुखको जिम्मेवारी दिइएको दाबी गरिएको छ । 

जानकारी अनुसार, अस्पतालमा १०औँ र ११औँ तहका कर्मचारी नै नरहेको बताईएको छ । ८औँ तहका ओमराज यादवलाई निमित्त बनाएर राखेको जनाइएको छ । यादवलाई हटाएर एक ७औँ तहका कर्मचारीलाई राखेको जनाईएको छ । 

यस्तै, मधेश प्रदेश स्वास्थ्य निर्देशनालयको निर्देशक पद पनि एक महिनाभन्दा बढी समयदेखि रिक्त रहेको बताइएको छ । उक्त पदमा समेत निमित्त प्रमुखको भरमा काम सञ्चालन भइरहेको छ ।

दरबन्दीअनुसार वरिष्ठ कर्मचारीलाई जिम्मेवारी नदिई कनिष्ठ तहका कर्मचारीलाई महत्वपूर्ण निकायको नेतृत्व दिइएको विषयमा स्वास्थ्य मन्त्रालयको प्रशासनिक निर्णयमाथि प्रश्न उठेको छ ।

यस विषयमा मुख्यमन्त्री कृष्णप्रसाद यादव, स्वास्थ्य तथा जनसंख्या मन्त्री नागेन्द्र साहको भूमिकामाथि समेत प्रश्न उठाइएको छ । कर्मचारी व्यवस्थापनमा राजनीतिक वा प्रशासनिक हस्तक्षेप तथा ‘सेटिङ’ भएको आरोपसमेत लगाइएको छ । यद्यपि त्यस्तो आरोपको स्वतन्त्र पुष्टि हुन बाँकी छ ।

स्वास्थ्य क्षेत्रका संवेदनशील निकायमा लामो समयसम्म निमित्तको भरमा काम सञ्चालन हुँदा प्रशासनिक निर्णय, आर्थिक व्यवस्थापन, खरिद तथा ठेक्कापट्टालगायतका विषयमा प्रभाव पर्न सक्ने भन्दै कर्मचारी वृत्तमा समेत असन्तुष्टि देखिएको छ ।

दरबन्दीअनुसारका कर्मचारी किन खटाइएनन्, वरिष्ठ कर्मचारीलाई जिम्मेवारी नदिई कनिष्ठलाई निमित्त बनाउनुको कानुनी आधार के हो र काज व्यवस्थापनको निर्णय कसरी गरिएको हो भन्ने प्रश्न अब मधेश प्रदेश सरकारसँग जोडिएको छ ।