किसानले मल नपाइरहेका बेला वडा सदस्य महतोले अन्य ठाउँमा विक्री गर्न लैजाँदै गर्दा पक्राउ, ४०० बोरा मल बरामद

न्यूज ब्यूरो, जनकपुरधाम । खेतीपातीको मुख्य समयमा किसानले रासायनिक मल अभाव झेलिरहेका बेला धनुषाको धनुषाधाम नगरपालिका–५ का वडा सदस्य सुरेश साहमाथि मल डिलरबाट ट्याम्पुमा लुकाएर अन्यत्र लैजान खोजेको आरोप लागेको छ ।

स्थानीयका अनुसार वडा सदस्य साहले डिलरबाट मल लिएर ट्याम्पुमार्फत मिथिला बिहारी नगरपालिकातर्फ लैजान खोजेको सूचना पाएपछि स्थानीय युवाले ट्याम्पु रोकी मल नियन्त्रणमा लिएका हुन् । नियन्त्रणमा लिइएको मल वडा कार्यालयमा लगेर सुरक्षित रूपमा राखिएको छ भने घटनाको विरोधस्वरूप स्थानीयले वडा कार्यालयमा ताल्चा समेत लगाएका छन् ।

गाउँका किसानले लामो समयदेखि मल नपाएर खेती प्रभावित भइरहेको अवस्थामा जनप्रतिनिधिले नै ठूलो परिमाणमा मल अन्यत्र लैजान खोज्नु गम्भीर विषय हो । उनीहरूले घटनाको निष्पक्ष छानबिन गरी दोषीमाथि कारबाही गर्न माग गरेका छन् ।

घटनापछि वडा क्षेत्रमा तनावको अवस्था सिर्जना भएको छ । स्थानीयले सम्बन्धित निकायलाई घटनाको सत्यतथ्य छानबिन गरी मल वितरण प्रक्रियामा भएको अनियमितता सार्वजनिक गर्न आग्रह गरेका छन् ।

उक्त घटनाबारे सम्बन्धित निकायले अनुसन्धान सुरु गरेको जनाइएको छ । यद्यपि वडा सदस्य सुरेश साहसँग भने सम्पर्क हुन सकेनन् ।

यस विषयमा कृषि सामग्री कम्पनी, स्थानीय प्रशासन तथा धनुषाधाम नगरपालिकाले पनि आवश्यक छानबिन गर्ने तयारी गरेको बताइएको छ । अनुसन्धानबाट प्राप्त तथ्यका आधारमा थप कानुनी प्रक्रिया अघि बढाइने जनाइएको छ।