प्रेस काउन्सिलले एभीन्यूजलाई सोध्यो स्पष्टिकरण

न्यूज ब्यूरो, सिरहा । प्रेस काउन्सिल नेपालले एभीन्यूज टेलिभिजनसँग स्पष्टिकरण माग गरेको छ ।

झा ब्रदर्स मिडिया हाउस प्रालि सिरहाले गरेको उजुरीको आधारमा काउन्सिलले एभीन्यूजसँग स्पष्टिकरण सोधेको हो ।

काउन्सिलले तीन दिनभित्र स्पष्ट जवाफ दिन एभीन्यूजलाई पत्रमार्फत् भनेको छ । गत बैशाख २६ गते झा ब्रदर्स मिडिया हाउसद्धारा सञ्चालित रेडियो मुस्कानको लागि आवश्यक उपकरण ल्याउन प्रेस लेखिएको गाडीसहित काठमाडौं गइरहेको विषयलाई मानहानी हुने तरिकाले एभीन्यूजले रिपार्ट प्रशारण गरेको थियो ।

काठमाडौं जाने क्रममा काभ्रेपलाञ्चोकको सांगास्थित एभीन्यूजले गाडीमा प्रेससमेत लेखिएको भएपनि र सो गाडीमा सवार रहेका झा ब्रदर्सका अध्यक्ष सितल झाले रेडियोको लागि उपकरण ल्याउन गइरहेको बताउँदा समेत प्रेसको गाडीमा यात्रु ओसारपोसार गरिरहेको भनेर सामाग्री सम्प्रेषण गरेकोे हो ।

यो पनि पढ्नुहोस् : टिआरपीकै लागि मानहानी गरेको भन्दै एभीन्यूजमाथि प्रेस काउन्सिलमा पर्यो उजुरी

लकडाउनमा सामाजिक दुरीलाई दुष्टिगत गर्दै उनीहरु चारजना मात्रै सवार भएर काठमाडौंका लागि हुइँकिएका थिए । लामो दुरी भएकाले दुई जना चालक र अध्यक्ष झासहित रेडियोका लेखा गाडीमा सवार थिए ।

गाडी सांगामा जाममा परेपछि स्थलगत रिपोर्टिंगमा रहेका एभीन्यूजका केदार कोइरालाले यात्रु ओसारपोसार गरिरहेको भनी भिडियो लिएको र प्रेस प्रमाणपत्र देखाउँदासमेत भ्रामक रिपोर्ट प्रशारण गरेको झाले बताए ।

सबै प्रमाण देखाउँदासमेत एभीन्यूजले टिआरपीकै लागि जबर्जस्ती मानहानी गरेको झाको आरोप छ । गलत र भ्रामक रिपोर्ट प्रशारण गरेर आफ्नो मिडिया हाउसको लोकप्रियतामा गम्भीर अवरोध पुर्याएको भन्दै झाले प्रेस काउन्सिलमा उजुरी दिएका थिए ।

यस्तो छ प्रेस काउन्सिलको पत्र