सिरहामा ५ हजार घुससहित प्रहरी जवान अख्तियारको फन्दामा

न्यूज ब्यूरो, सिरहा । सिरहाबाट एक प्रहरी जवान घुस रकमसहित रंगेहात अख्तियारको फन्दामा परेका छन् ।

सिरहाको सुखीपुरबजारबाट व्यापारीसँग घुस लिएको आरोपमा ईलाका प्रहरी कार्यालय सुखीपुरमा कार्यरत प्रहरी जवान राजकुमार यादव पक्राउ परेका हुन् । बुधबार बिहानै उनलाई पाँच हजार रुपैयाँ घुससहित अख्तियारको टोलीले पक्राउ गरेको हो ।

एक व्यापारीसँग घुस लिने बित्तिकै प्रहरी जवान यादवलाई सुखीपुर बजारबाटै नियन्त्रणमा लिइएको अख्तियार दुरुपयोग अनुसन्धान आयोगको कार्यालय बर्दिबासले जनाएको छ । भारतीय बजार लदनियाँबाट समान ल्याउन मद्दत गरिदिने भन्दै यादवले व्यापारीसंग घुस लिएको बताइएको छ ।

पक्राउ परेका प्रहरी जवान यादवलाई अख्तियारको टोलीले अख्तियार दुरुपयोग अनुसन्धान आयोगको कार्यालय बर्दिबास लगेको छ ।