• २०७६ कार्तिक ७ गते, बिहीबार



४ महिनादेखि बाटो पूर्णरुपले ठप्प, जनप्रतिनीधिलाई मतलब छैन 

यता, दुर्गम क्षेत्र हेतु विजुली प्रयोजनको लागि आएको सोलार सिस्टम समेत उनले एउटै आफ्नो घर पछाडी मात्र लगाएको बताइएको छ ।

न्यूज ब्यूरो, जनकपुरधाम ।  धनुषाको जनकनन्दिनी गाउँपालिकाको एक वडाको बाटो विगत ४ महिनादेखि ब्लोक (बन्द) भएपनि जनप्रतिनीधिहरु खासै चासो देखाएका छैनन् । 

 

जनकनन्दिनी गाउँपालिकाको वडा नं. १ मलहनियाँदेखि फूलबरिया जाने बाटो विगत ४ महिनादेखि ब्लोक भएपनि वडाध्यक्ष वा गाउँपालिकाका पदाधिकारीहरुले चासो नदिएको कारण आम सर्वसाधारण खतरापूर्ण र जोखिमपूर्ण बाटो अपनाउन बाध्य भएका छन् । गत असारमै आएको भिषण बाढीले कमला नदिको तटबन्ध भत्काउँदा बगाएको बाटो अहिलेसम्म जिर्णोद्धार नहुँदा स्थानीयवासीहरु पीडित भएका छन् । 

 

 

 

वडा नं. १ मल्हनीया गाउँ र मुख्य सडकबाट जोडिएको उक्त सडकमा अहिले पनि हिलो र पानी जमेकै कारण सवारी आवागमन गर्न समेत कठिनाई भएको छ । यस बारे वडावासीहरुले वडाध्यक्ष धर्मेन्द्र गोईतलाई पटक पटक जानकारी गराएपनि कुनै प्रकारको चासो नलिएको गुनासो नाम नखोल्ने शर्तमा एक स्थानीयले बताए । उनले भने, - "हामीले पटक पटक सडकको जिर्णोद्धारको लागि वडाध्यक्षलाई भन्यौ, उनले खासै चासो लिएनन्, हाम्रो वडामा शून्य विकास भन्दा पनि हुन्छ । वडाध्यक्षमा जीतेदेखि अहिलेसम्म एउटै विकास गरेको छ त्यो हो उनले आफ्नो घरको पछाडी सोलार लगाएको, बाँकी पुरै गाउँ त्यतिकै अँध्यारो छ ।"  त्यस गाउँमा करिब २ वर्षअघि नै विजुली बत्ति भने बलिरहेको जनाइएको छ । 

 

 

जनकनन्दनी गाउँपालिका वडा नं १ मालहनिया देखि फूलबरिया जाने मेन रोडको करिब २ किलोमटिरको बाटो अति जीर्ण भएपनि गाउँपालिकाको कुनै जनप्रतिनीधिले चासो नलिँदा हालात जरजर भएको बताइएको छ । पहिलेदेखि नै त्यो बाटोको अवस्था जीर्ण रहेपनि गत असारको बाढीले झन हिडनै नसकिने बनाएपछि पैदलयात्रीलाई पनि सास्ती भएको बताइएको छ । भारतीय सीमासँग जोडिएर रहेको मल्हनीयाँ धनुषाको दुर्गम गाउँमध्ये एक मानिन्छ । लाखौंको बजेट विनियोजन भएपनि आसेपासलाई उपभोक्ता समिति र कमिशनमा कुरा नमिलेपछि बाटो जौं को त्यौं रहेको आरोप लगाइएको छ । 


यता, दुर्गम क्षेत्र हेतु विजुली प्रयोजनको लागि आएको सोलार सिस्टम समेत उनले एउटै आफ्नो घर पछाडी मात्र लगाएको बताइएको छ । सोलार सिस्टम त्यस वडाको लागि वडाभरि सार्वजनिक स्थल र विजुली कटेको बेला सुरक्षा दृष्टिकोणले जडानको लागि पारित भएपनि वडाध्यक्ष गोईतले आफ्नो घरपछाडी मात्र जडान गरेको बताइएको छ । यस सन्दर्भमा गाउँपालिकाका उपाध्यक्ष भारती कार्की, अध्यक्ष अब्दुल बारिक शेख र वडाध्यक्ष धमेन्द्र गोईतसँग यसबारे प्रतिक्रिया लिन खोज्दा सम्पर्क हुन सकेनन् । गाउँपालिका अध्यक्ष शेख र वडाध्यक्ष गोईतको मोबाईल स्वीच अफ आइरहेको थियो । 

Loading...
श्री त्रिनेत्र न्यूज नेटवर्क प्रा.लि. द्धारा सँचालित "न्यूज ब्यूरो" डिजिटल पत्रिका | समाचारको लागि : +977-9854028045 मा फोन गर्नुहोस् ।
यो समाचारमा तपाईको विचार COMMENT गर्नुहोस्
  • सम्बन्धित समाचारहरु


  • Loading...