कमला बचाउ अभियानलाई तीव्रता, सिरहामा सामुहिक प्रतिबद्धता

न्यूज ब्यूरो, धनुषा/सिरहा । धनुषा र सिरहाको सीमाना मानिएको पवित्र कमला नदी बचाउको लागि थालिएको अभियानलाई तीव्रता दिइएको छ ।

प्रत्येक शनिबार साप्ताहिक रुपमा कमला बचाउ अभियानको क्रममा अहिले गाउँ गाउँमा पुगेर अभियानीहरुले जनचेतना फैलाउने कार्यक्रम गरिरहेका छन् भने २०७५ को अन्तिम दिन शनिबार सिरहाको बसपिट्टामा चेतनामूलक कार्यक्रम गरिएको हो ।

कमला बचाउ अभियानका अध्यक्ष एवम् अभियानी विक्रम यादवको नेतृत्वमा गएको अभियानीहरुको टोलीले सिरहाको बसपिट्टा घाटमा कमला बचाउ अभियानको कार्यक्रम गरी कमला नदी बचाउनुको उदेश्य बारे प्रकाश पारिएको थियो ।

सिरहा नगरपालिका वडा नं. ६ का वडाध्यक्ष विजय कुमार यादवको अध्यक्षतामा सम्पन्न सो कार्यक्रममा सहभागीहरुले कमला नदी बचाउको लागि सामुहिक रुपमा प्रतिवद्धता जाहेर गर्दै आफनो तवरबाट हुने हरेक प्रकारको सहयोगको लागि तत्परता देखाएका थिए ।

वडाध्यक्ष यादवले कमला नदिको केही भाग आफ्नो वडामा परेको भन्दै आफ्नो वडास्तरबाट हुने आर्थिक, भौतिक, समाजिक लगायत हरेक प्रकारको सहयोग गर्ने प्रतिवद्धता जनाए । सो क्रममा उनले आफ्नो वडावासी समेत कमला नदी बचाउको लागि तत्पर रहने बताए । उनले कमला नदीको विनास सबैले देखेकै बेला कमला नदीको अस्तित्व बचाउनको लगि पनि हामी नै तत्पर हुनुपर्ने बताए । उनले यसबाट हाम्रा वडावासीलाई मात्र होईन सिँगो दुई जिल्लालाई नै प्रत्यक्ष रुपमा फाईदा हुने बताए ।

सो कार्यक्रममा कमला बचाउ अभियानका अध्यक्ष एवम् अगुवा विक्रम यादवले पानीको महत्व सहित कमला नदी बचाएपछि हुने फाईदा र उदेश्यको बारेमा विस्तृत जनचेतनामूलक सन्देशहरु प्रवाह गरेका थिए । उनले प्रत्येक शनिबार कमला बचाउ अभियानको लागि आफूहरुले कमला नदीको छेउमा बसोबास गर्ने वस्तीहरुमा गएर कमला बचाउको लागि उत्प्रेरित गर्ने गरेको बताए ।

नेपाल रेडक्रस सोसाईटी सिरहाका सभापति राजदेव यादवले कमला बचाउ अभियान आफैंमा एक गौरवको विषय भएको प्रतिक्रिया दिए । उनले कमला नदीलाई संरक्षण गर्न सके प्रयाप्त रुपमा प्रत्यक्ष अप्रत्यक्ष फाईदा हुने बताए । कोशी टप्पु झैँ कमला पनि टप्पु निर्माण गरी बाह्य तथा आन्तरिक पर्यटकलाई भित्रयाउन सकिने जनाउँदै यसबाट सिरहा नगरवासीलाई फाईदैफाईदा पुग्ने बताए । उनले पनि हरेक प्रकारको सहयोगको प्रतिवद्धता जाहेर गरे ।

कार्यक्रममा सहभागी स्थानीयहरुले नील गाईको आतंक, बन्देल (वन सुँगुर) को आतंकले आफूहरु त्रसित भएको जनाउँदै यसलाई नियन्त्रण गर्न सके कमला नदीको बालुवामा बगर खेती गर्न सकिने अपेक्षा राखेका थिए । उनीहरुले बालीनाली लगाएपनि यी जीवहरुले बर्बाद पार्ने गरेकोले बालीनाली लगाउन छाडेको बताएका थिए । कमला नदीमा वृक्षारोपण सहित बगर खेती गर्ने विचार भएपनि बन्देल र नील गाईको आतंकले आफूहरु पछाडी हटेको गुनासो पोखे ।

सो कार्यक्रममा कमला बचाउ अभियानका सचिव विनोद कुमार महरा, सिरहा नगरपालिका वडा नं. ८ का वडाध्यक्ष नागेन्द्र यादव, युवा नेता एवम् अभियानी रामबाबू यादव, कमला बचाउ अभियानका श्रीप्रसाद यादव, सुनिल यादव, फोरम नेपालका प्रत्यासी उम्मेदवार प्रकाश गोईत सहित वडासदस्यहरु पटि यादव, राम नरेश यादव, रामकली देवी यादव, किसनी देवी महरा, राम नारायण गुरमैता, राजाराम बनरैत लगायत रामपृत साह, रामदेव तेथवार, राम स्वार्थ पासवान, जय प्रकाश गोईतको सहभागी रहेको थियो ।

चेतनामूलक अभियान कार्यक्रममा कमला बचाउ अभियानका अभियानी राज किशोर सल्हैता, सुरेन्द्र यादव सहित अभियानी संजीव कुमार यादव, रेडियो सल्हेशका सँचारकर्मी बैद्यनाथ यादवको विशेष उपस्थिति रहेको थियो ।

सो कार्यक्रम पश्चात अभियानमा तीव्रता दिँदै बसपिट्टा घाटमै कमला छेउमा बौद्धी वृक्ष पिपलको बोट रोपिएको हो । यसको रेखदेखको जिम्मेवारी भने वडाध्यक्ष विजय कुमार यादवको मातहतमा हुनेछ ।