एसईई परीक्षा : प्रदेश २ को आठै जिल्लाको परीक्षा रद्द ,अब कहिले हुने ?

न्यूज ब्यूरो, जनकपुरधाम । आईतबारदेखि सँचालन भएको एसईई परीक्षाको चौथो दिन अनिवार्य विज्ञान विषयको परीक्षा सम्पन्न भएको छ ।

परीक्षा हुनु एक दिन अगावै विज्ञान विषयको प्रश्नपत्र आउट भएपछि प्रदेश नं. २ को आठवटै जिल्लाको परीक्षा रद्द गर्ने भएको छ । प्रदेश नं. २ को शिक्षा निर्देशनालयले जनाए अनुसार एक दिन अगाडी नै प्रश्नपत्र आउट भएको पुष्टि भएपछि उक्त विषयको परीक्षा रद्द हुने भएको जनाइएको छ ।

निर्देशनालयका निर्देशक रामाकान्त शर्माले जनाए अनुसार, अनिवार्य विज्ञान विषयको प्रश्नपत्र परीक्षा हुनु अगावै नै आउट भएको थियो । विहान करिब ६ बजेर १० मिनेटमा प्रश्नपत्र आउट भएको पुष्टि गर्दै उनले विज्ञान विषयको परीक्षा ८ वटै जिल्लाकै रद्द गर्ने निर्णय गरिएको जनाए ।

शर्माले यसअघि पनि रौतहटको एक परीक्षाकेन्द्रबाट नेपाली विषयको प्रश्नपत्र परीक्षा अगावै बाहिरिएको बारेमा सोध्दा त्यो हल्ला मात्र रहेको बताउँदै यो विज्ञान विषयको प्रश्नपत्र आउट नै भएको पुष्टि भएपछि मात्र रद्द गर्ने निर्णय गरिसकेको थपे ।

प्रश्नपत्र सबभन्दा पहिले सिरहाको कुनै एक परीक्षाकेन्द्रबाट आउट भएको चर्चा समाजिक सञ्जालमा भएपनि यस बारे अनुगमन टोलीले खोज अनुसन्धान गरिरहेको शर्माले बताए । उनका अनुसार, आजको रद्द गरिएको विज्ञान विषयको परीक्षा भने आउँदो चैत्त २२ गते पुनः लिइने छ ।