• २०७६ जेठ ११ गते, शनिबार
१२:४६ pm

जनकपुरबाट २० लाखको सुनचाँदी सहित दुई जना पक्राउ 

प्रहरीले पक्राउ परेका दुवै जनालाई आवश्यक कारबाही प्रक्रिया अगाडी बढाएको छ ।


न्यूज ब्यूरो, जनकपुरधाम । सोमबार जिल्ला प्रहरी कार्यालय धनुषाले जनकपुरबाट दुई जनलाई करिब २० लाखको महँगो धातु अबैद्य सुनचाँदी सहित पक्राउ गरेका छन् ।


जिल्ला प्रहरी कार्यालय धनुषाले सोमबार विहानै पत्रकार सम्मेलन गरी पक्राउ परेका दुई भारतीय नागरिकलाई सार्वजनिक गरेका छन् । पक्राउ पर्नेहरुमा भारतको विहार राज्य मधुवनीको बासोपट्टी वडा नं. ४ का ३७ वर्षिय कृष्ण कुमार महतो सुडी र सोही ठाउँका ३० वर्षिय रुपेश महतो रहेका छन् ।


आईतवार साँझ जनकपुरधाम उपमहानगरपालिका १५ कुवाबाट सुडी र महतोलाई पक्राउ गरिएको जिल्ला प्रहरी कार्यालय धनुषाले पत्रकार सम्मेलनमा जानकारी गराएका छन् ।   विआर ३२ एस ४३५७ नम्बरको मोटरसाइकलबाट सुनको बाला २ थान गोलो टुक्रा २ थान गरी १ सय ग्राम र चाँदीको दाना ९ प्याकेट २५ किलोग्राम बरामद भएपछि उनीहरुलाई पक्राउ गरिएको एसपी शेखर खनालले बताए ।

 

 बरामद सुन ५ लाख २४ हजार ७ सय, चाँदी १६ लाख १८ हजार २५० र मोटरसाइकल ७० हजार बराबरको रहेको उनले जानकारी दिए । उक्त भारतीय नम्बरको पल्सर मोटरसाइकल चढी उनीहरु जनकपुर हुँदै भारततर्फ जान लागेका थिए ।

 

 प्रहरीले विशेष सूचनाको आधारमा गाडी रोकेर चेक गर्दा ट्यांकी भित्रमा सेतो रंगको प्लाष्टिकमा बेरेर राखेको अवस्थामा सुनचाँदी बरामद भएको प्रहरीले जनाएको छ ।


प्रहरीले पक्राउ परेका दुवै जनालाई आवश्यक कारबाही प्रक्रिया अगाडी बढाएको छ ।

श्री त्रिनेत्र न्यूज नेटवर्क प्रा.लि. द्धारा सँचालित "न्यूज ब्यूरो" डिजिटल पत्रिका र "रेडियो कमला" अनलाईन , सदैव तपाईको साथमा  |
प्रतिकृया दिनुहोस