धनुषामा एक बालिकालाई हत्या गरी जलाईएको अवस्थामा फेला !

न्यूज ब्यूरो, २ फागुन । धनुषामा एक बालिकालाई हत्या गरी जलाएको घटना बाहिरिएको छ ।

धनुषा जिल्लाको मिथिला नगरपालिका वडा नं. ३ मगरटोलमा एक बालिकालाई जलाएको अवस्थामा भेटेपछि स्थानीयहरुले प्रहरीलाई खवर गरेको थियो । प्रहरीले दिएको जानकारी अनुसार, मिथिला नपा वडा नं. ३ हरिहरपुरको नारायण रैसेलीकी छोरी अन्दाजी बर्ष ११ की दुतिया रैसेली रहेको छ । बालिका आधि जलेको अवस्थामा स्थानीयहरुले देखेका थिए ।

मगर टोलको मरला धार भन्ने ठाउँमा रैसेलीको शव आधि जलेको अवस्थामा थियो । आगो लगाएर जलाएको देखिएको छ । घटनाको मुचुल्का र प्रहरीको प्रारम्भिक जानकारी अनुसार ती ११ वर्षिय बालिकालाई मारेर जलाएको वा जलाएर मारेको भन्ने बारे यकिन हुन नसकेको ईलाका प्रहरी कार्यालय ढल्केवरका प्रहरी नीरिक्षक सरोज राईले जानकारी दिए ।

उनका अनुसार, उक्त घटनाको अनुसन्धानको लागि प्रदेश प्रहरीको आग्रहमा हेटौडाबाट डग टोली आएको बताए । डग टोली आएर उक्त घटनास्थलको प्रारम्भिक अनुसन्धान गरेर पुनः फर्केको हो । यस घटनाबारे अनुसन्धान तीव्र पारिएको भन्दै कसले, किन र कसरी जलाएको बारे पोष्टमार्टमको रिपोर्टपछि मात्र भन्न सकिने जिल्ला प्रहरी कार्यालय धनुषाले जानकारी दिएका छन् ।

यता, स्थानीयहरुले भने घटनाको प्रकृति हेर्दा बालिकालाई जिउँदै जलाएको हुनुपर्ने अनुमान गरेका छन् ।