'आरम्भ' को अर्को कदम : जर्जर अवस्थामा रहेको विद्यालयलाई जिल्लाकै नमूना बनाउने

सिरहा, २६ माघ । शिक्षा क्षेत्रमा विभिन्न उदाहरणीय कार्यहरु गरेर चर्चा बटुलिरहेका आरम्भ साईन्स एण्ड कल्चर क्लब गोलबजारले पुनः एक नयाँ अभियान थाल्ने भएको छ ।

सिरहाको गोलबजार नगरपालिका २ गुरुधाममा अवस्थित श्री जनसमूह आधारभूत विद्यालयलाई जिल्लाकै नमुना विद्यालय बनाउने संकल्पसहित 'नमूना विद्यालय अभियान' को थालनी गर्ने भएको हो ।

यस अभियानको औपचारिक घोषणा सरस्वती पूजाको दिन विद्यालय प्रांगणमा एक कार्यक्रमबीच गरिने क्लबका अध्यक्ष रामकुमार यादवले जानकारी दिए ।

सरोकारवालाको लापरबाहीका कारण विद्यालयको अवस्था जर्जर भएपछि यस विद्यालयलाई अरु कुनै विद्यालयमा गाभिने सम्भावना बढ्दो देखिरहेका बेला क्लब एक्सनमा आएको हो ।

विद्यालयको भौतिक अवस्था संतोषजनक रहेपनि पठनपाठनमा भने भंयकर त्रुटि देखिएको छ । वडा २ का वडाध्यक्ष लक्षमण साहले भने, 'हालको अवस्थामा ६ जना शिक्षकशिक्षिकाले १० जना विद्यार्थी पढाइरहेको अवस्था छ, यहि अवस्था रहिरहे सो विद्यालय अरु कुनै स्कुलमा गाभिने कुरा निश्चित देखिन्छ ।'

सरोकारवालाको अनिगरानीका कारण विद्यालयको अवस्था नाजुक बनेपछि क्लबले विद्यालय व्यवस्थापन समिती, वडा कार्यालय र नगरपालिकासमेतको सहकार्यमा यस अभियानको सुभारम्भ गर्ने जनाएको छ ।

विद्यालय स्थापनाका बखत अग्रजहरुले धेरै संघर्ष गरेको भन्दै अहिले आएर अरु नै कुनै विद्यालयमा गाभ्न दिएर उहाँहरुको अपमान हुन नदिने अध्यक्ष यादवले बताए । विद्यालयलाई बिस्तारै ५ वर्षभित्र जिल्लाकै नमूना विद्यालयको रुपमा स्थापित गर्ने क्लबको लक्ष्य छ ।

क्लबले सरस्वती पूजाको दिन एक भव्य संस्कृति जगेर्नात्मक कार्यक्रमको आयोजन गरी वडाका प्रतिनिधि, व्यवस्थापन समिति, अभिभावक, शिक्षक, विद्यार्थी लगायत सम्बन्धित सम्पूर्णलाई भेला गराएर अभियानको घोषणा गर्न लागेको अध्यक्ष यादवले जनाए ।

अभियान सफल पार्नका लागि क्लबले सबैसँग सहयोगको अपेक्षासहित अभियानमा जुट्न सबैलाई आह्वान समेत गरेको छ ।

केहि दिनअघि मात्रै क्लबले गोलबजार जम्दहमा पुस्तकालयको स्थापना गरेको थियो भने शिक्षा र समाजको अवस्था हराभरा बनाउन क्लबले विभिन्न अभियान तथा कार्यक्रमहरु गर्दै आएको छ ।