• २०७५ माघ ९ गते, बुधबार
०८:४९ am

राजपा सांसद रेशम चौधरीले अन्ततः लिए शपथ

निलम्बित सांसदको रुपमा उनलाई डिल्लीबजार कारागारमै राखिने । 

न्यूज ब्यूरो, जनकपुरधाम । कैलालीको टीकापुरमा भएको हिंसात्मक घटनाका मुख्य योजनाकारको रुपमा पुर्पक्षका लागि थुनामा रहेका राजपा नेता तथा सांसद रेशम चौधरीले पद तथा गोपनीयताको शपथ खाएका छन् ।

 

सभामुख कृष्णबहादुर महराले सिंहदरबारमा आज उनलाई पद तथा गोपनीयताको शपथ ग्रहण गराएका हुन् । उनले थारु भाषामै शपथ लिएका छन् ।

 

चौधरी गत वर्ष भएको प्रतिनिधि सभाको चुनावमा कैलाली क्षेत्र नम्बर १ बाट ३४३४१ मत ल्याएर विजयी भएका थिए । उनको निकटतम प्रतिस्पर्धी तत्कालीन वाम गठबन्धबाट एमाले उम्मेदवार मदनकुमारी शाह (गरिमा) ले १३ हजार ४०६ मत मात्र ल्याएकी थिइन् भने चौधरी र शाहबीचको मतअन्तर २० हजार ९ सय ३५ थियो । निर्वचित भएको एक झण्डै वर्षपछि उनलाई पद तथा गोपनीयताको सपथ दिलाइएको हो । 

 

उनलाई आज (बिहीबार) बिहान साढे ११ बजे शपथ ग्रहण गराउने कार्यक्रम रहेपनि संसद बैठकको समय भएपछि ३ बजेलाई शपथ कार्यक्रम सारिएको थियो ।

 

राष्ट्रिय जनता पार्टी नेपालले चौधरीलाई शपथ दिलाउनेलगायतका आफ्ना मागहरु पूरा नगरेकाले सरकारलाई दिएको समर्थन फिर्ता गर्ने चेतावनी दिएपछि सरकारले उनको शपथको व्यवस्था मिलाएको हो ।

 

०७२ भदौ ७ गते कैलालीको टीकापुरमा थारू आन्दोलन उत्कर्षमा पुगेको बेला डेढ वर्षीय नाबालकसहित आठ जना सुरक्षाकर्मीको सामूहिक हत्या भएको थियो । उक्त आन्दोलनलाई चर्काउन चौधरीले मुख्य भूमिका खेलेको आरोप लागेको थियो । उनले चुनाव जितिसकेपछि गत फागुन १४ अदालतसामु आत्मसमर्पण गरेका थिए । 

 

सपथ ग्रहण गराइएपनि उनलाई अहिले निलम्बित सांसदको रुपमा डिल्लीबजार कारागारमै राखिने छ । 
 

श्री त्रिनेत्र न्यूज नेटवर्क प्रा.लि. द्धारा सँचालित "न्यूज ब्यूरो" डिजिटल पत्रिका र "रेडियो कमला" अनलाईन , सदैव तपाईको साथमा  |
resized image

न्यूज ब्यूरो, डेस्क

सम्पादन कक्ष

प्रदेश नं. २, जनकपुरधाम - नेपाल

न्यूज ब्यूरो, डेस्क || विभिन्न जिल्लाहरुबाट आएका समाचारहरुलाई सम्पादन गरी पाठकवर्ग समक्ष साँझा गरिन्छ । मुख्य कार्यालय : प्रदेश नं. २, जनकपुरधाम–२, कदमचोक । फोन नं. +97741-420085, ईमेल ठेगाना – [email protected]

प्रतिकृया दिनुहोस