गोलबजारमा पुस्तकालय स्थापना हुँदै, स्थापनाको अवसरमा २ दिन विद्यार्थी मेला

न्यूज ब्यूरो, सिरहा । आरम्भ साईन्स एण्ड कल्चर क्लब गोलबजारले पुस्तकालय स्थापना गर्ने भएको छ । क्लबले परिवर्तनका लागि शिक्षा, शिक्षाका लागि पुस्तकालय भन्ने मुल नाराका साथ गोलबजार नगरपालिका ३ जम्दहमा पुस्तकालय स्थापना गर्न लागेको हो ।

गोलबजार वडा ३ समेतको सहकार्यमा क्लबद्धारा स्थापना हुन लागेको पुस्तकालयका लागि पुस्तक संकलन कार्य तीव्र पारिएको छ । क्लबले पुस्तकालयको लागि चाहिने पुस्तकपुस्तिका तथा अन्य सामग्रीहरु जुटाउन अभियान नै संचालन गरेको छ ।

सिरहा तथा यस क्षेत्रको शैक्षिक अवस्थामा सुधार गर्ने हेतुले पुस्तकालय स्थापना गर्न लागिएको क्लबका अध्यक्ष रामकुमार यादवले न्यूज ब्यूरोसँग भने ।

पुस्तकालय स्थापनाको अवसर पारेर क्लबले माघ ४ र ५ गते बृहत विद्यार्थी मेलाको समेत आयोजना गरेको छ । क्लबले विद्यार्थी मेलामा अन्तर स्कूल हाजिरी जवाफ प्रतियोगिता, मिथिला चित्रकला, डकुमेन्ट्री प्रेजेन्टेसनसँगै सांस्कृतिक कार्यक्रमहरु समेत तय गरेको हो ।

हाजिरी जवाफ प्रतियोगिताका उत्कृष्ट १५ जना विद्यार्थीहरुलाई काठमाडौं, बिराटनगर, जनकपुर र सिरहा जिल्लाको विभिन्न कलेजहरुमा उच्च शिक्षाका लागि उचित छात्रवृत्तिको प्रदान गरिने क्लबले जनाएको छ ।

आरम्भ साईन्स एण्ड कल्चर क्लबले स्थापनाको छोटो समयमै विभिन्न उदाहरणीय कार्यहरु गरिसकेको छ भने समाज परिवर्तनका लागि आफ्नो अभियान निरन्तर जारी राखेको छ ।

क्लबले यस अभियानमा हातेमालो गरी आ-आफ्नो स्तरबाट सहयोग गर्न सबैलाई आग्रह समेत गरेको छ ।