धनुषामा १० बर्षिय बालिकाको शव धानबालीमा, बलात्कार भएको आशंका !

न्यूज ब्यूरो, जनकपुरधाम । धनुषामा एक १० बर्षिय बालिकाको शव धानबालीमा फेला परेको छ ।

शनिबार दिउँसो करिब १२ बजेको समयमा औरही गाउँपालिका वडा नं. २ परवाहा बस्ने राम अशिष यादवकी छोरी अन्दाजी बर्ष १० की मनिता कुमारी यादवको शव नजिककैको धानबालीमा फेला परेको हो । विहान करिब ८ बजे मृतक बालिकाको अभिभावकले छोरी हराएको उजुरी गर्न ईलाका प्रहरी कार्यालय औरही पुगेपछि बालिकाको खोजी कार्य सुरु गरिएको थियो ।

शनिबार स्थानीयहरुले मनिकाको शव धानबालीमा निर्वस्त्र देखेपछि प्रहरीलाई खवर गरेको थियो । शवको प्रकृति हेर्दा बालिकालाई बलात्कार गरी हत्या गरिएको हुन सक्ने अनुमान गरिएपनि विस्तृत जानकारी पोष्टमार्टमको रिपोर्टपछि मात्र आउने औरही प्रहरीले जनाएको छ ।

मृतक बालिकाको शव पूर्णत निर्वस्त्र फालिएको थियो भने उनको वस्त्र शवको करिब १० मिटर पर फालिएको भेटाएको प्रहरीले जनाएको छ । घटनाको मुचुल्का उठेको छ भने शवलाई पोष्टमार्टमको लागि जनकपुर अञ्चल अस्पतालमा ल्याइको छ । घटना बारे थप विवरण आउन बाँकी छ ।