"मधेसी पुत्र-३" को लागि बलिवुडका किरण कुमार र मोहन जोशी मधेस आउँदै

न्यूज ब्यूरो |
सप्तरी, २८ साउन । मधेसी पुत्र र मधेसी पुत्र २ को अपार सफलतापछि बन्न लागेको मधेसी पुत्र ३ को लागि बलिउड कलाकारहरु मधेश आउने भएका छन् । नेपालको मधेशमा निर्माण हुने मैथिली फिल्ममा अभिनय गर्न बलिउड कलाकारहरु मधेस आउने पक्कापक्की भएको छ ।

 

दर्जनौँ बढी बलिवुड फिल्ममा आफ्नो अभियनय मार्फत दर्शकलाई आफ्नो दिवाना बनाएका वरिष्ठ कलाकार किरण कुमार र मोहन जोशी  मधेशी पुत्र ३ फिल्ममा अभिनय गर्नका लागि  मधेश आउन लागेको फिल्मका निर्माता तथा निर्देशक निराजन मेहताले जानकारी दिए । 

 

मेहताका अनुसार आगामी दशैंबाट यो फिल्मको छायांकन प्रारम्भ गरिनेछ ।दशैंबाट छायांकन प्रारम्भ भए पनि मोहन जोशी र किरण कुमार दीपावलीसम्म यता आउनेछन् । 
मेहताले यसअघि मधेशी पुत्र र मधेशी पुत्र २ फिल्मको निर्माण सम्पन्न गरिसकेका छन् । 

उनले निर्माण गरेको मधेशी पुत्र २ फिल्म रिलिजमा नेपाल चलचित्र विकास बोर्डले रोक समेत लगाएको थियो । पछि केही दृश्य हटाइएपछि यो फिल्मलाई प्रदर्शनको अनुमति दिइएको थियो । मधेशी पुत्र २ फिल्ममा मधेशमा देखिएका समस्याहरुलाई उजागर गरिनेछ ।

 फिल्ममा बलिउड कलाकार मोहन जोशी वरिष्ठ समाजसेवीको भूमिकामा देखिनेछन भने किरण कुमार खलनायकको भूमिकामा देखापर्ने निर्देशक मेहताले बताए । मेहताले यसअघि निर्माण गरेको दुबै मधेशी पुत्र फिल्मले मधेशका साथै विदेशमा पनि चर्चा पाएका छन् ।